Eingin ætlan um fleiri hjálparpakkar

Fleiri hjálparpakkar eru ikki á veg úr landsstýrinum.

Tað endurtekur Helgi Abrahamsen, landsstýrismaður, í svari til Aksel V, Johannesen, løgtingsmann.

Hann spurdi um hjálparpakkar til íverksetarar og smáar vinnurekandi. 

Men svarið úr landsstýrinum er, at tær fyritøkur, sum væntast at fáa ein lønandi rakstur, tá samfelagið aftur verður rikið sum vanligt, fáa óivað ta neyðugu hjálpina frá peningastovnunum hesar næstu fáu mánaðirnar.

Broytist støðan aftur til tað verra, og ikki ber til lata uppaftur sum ætlað, kann sjálvandi gerast neyðugt við almennum tiltøkum, sigur Helgi Abrahamsen.

129 umsóknir

Upplýst verður í svarinum, at 129 umsóknir komu um pengar úr hjálparpakka tvey.

Seks umsóknir vórðu vrakaðar.

26 fyritøkur skuldu gjalda allan stuðulin aftur, antin tí tær ikki lótu endaliga uppgerð inn, ella tí, at niðurgongdin í umsetningi var minni enn 40 prosent.

TAKS broytti útreiðslurnar hjá 26 fyritøkum, tí mett varð ikki, at talan var um fastar útreiðslur. Tí skuldi fyritøkan rinda part av stuðlinum aftur. 

Hjá 30 fyritøkum var talan um automatiska regulering í sambandi við uppgerðina. 

Og 30 fyritøkur fingu meira enn tær søktu um.

Til hjálparpakka trý, sum var ætlaður ferðavinnuni, komu 38 umsóknir. 31 teirra vóru játtaðar.