Ummælisfreistin er í dag

Í dag er seinasta freist hjá almenninginum at gera viðmerkingar til ætlaðu broytingarnar hjá Strandferðsluni á bygdaleiðunum, sum koyra millum Havnina og økini norðan fyri høvuðsstaðin.

Strandferðslan gjørdi fyrst í mars av at broyta nakrar leiðir hjá Bygdaleiðum eftir atfinningar, sum vóru frammi, tá Eysturoyartunnilin læt upp.

Strandferðslan ásannaði, at ferðslumynstrið er broytt, og at stovnurin tí má broyta leiðirnar, sum koyra millum Havnina og økini norðanfyri.

Leið 400 fer aftur at koyra millum Klaksvík og Havnina gjøgnum Sundalagið, sum tann leiðin gjørdi, áðrenn Eysturoyartunnilin læt upp.

Snarleið

Ein nýggj snarleið, leið 401, fer at koyra gjøgnum Eysturoyartunnilin á morgni og seinnapart millum Klaksvík og Havnina, og steðgað verður eftir ætlan í Leirvík, Gøtudali og Runavík.

Fleiri politikarar og onnur hava gjørt vart við, at tey eru sera ónøgd við, at tað eru so fáir túrar gjøgnum Eysturoyartunnilin um dagin.

Leið 450 fer at koyra gjøgnum Eysturoyartunnilin, úr Havn inn á Strendur og til Runavíkar, og aftur til Havnar sjey ferðir gerandisdagar. Tann leiðin fer eisini at koyra um vikuskiftið.

Broytingarnar á leiðunum koma eftir ætlan í gildi 1. apríl, sigur Strandferðslan.