Kunnu bíleggja koppseting

Nú verður ein bíleggingaskipan til korona koppseting tikin í nýtslu. Bíleggingarnar fara fram á corona.fo, og skipanin verður latin upp seinni í vikuni.

Næsta sending av koppingarevni kemur hósdagin, og hon verður givin teimum, sum eru 65 ella eldri, og fáa røkt ella hjálp.

Síðani verður farið at koppseta eftir aldri, og byrjað verður við teimum, sum eru 85 ár og eldri. Tá tann bólkurin er liðugt koppsettur, verða tey millum 80 og 85 ár koppsett.

Kunngerðin víðkað

Koppsetingarkunngerðin varð herfyri víðkað við nýggjum bólkum av fólki, ið standa næst at sleppa framat at verða koppsett fyri koronu. 

Samstundis er koppsetingarkalendarin dagførdur, so til ber hjá fólki at fylgja við, nær tey kunnu vænta at eiga tørn.

Nýggju bólkarnir í kunngerðini fevna um fólk, sum eru komin upp í árini, men annars eru væl fyri, og sum ikki hava tørv á serstakari hjálp at verða koppsett.