Alibátur hjá Bakkafrosti í Hovi sokkin

(dagførd kl. 15.47)

Alibáturin, Krossteinur, sum er 11 metrar langur og 5 metrar breiður, hoyrir til alibrúkið hjá Bakkafrosti í Hovi. Óhappið hendi hálvan fjórðing út fyri Porkerisnesi, millum Hovsfjørð og Vágsfjørð.

Eldur kom í alibátin, sum var á veg úr Hovi suður til Vágs.

Ein annar alibátur, Stórafles, var á leiðini og fór til hjálpar. Fyrst var roynt at sleipa, men seinni varð endin sleptur og menninir tiknir av Krossteini. Krossteinur tók tá sjógv inn og hevði fingið slagsíðu. Brimil og Skarvanes fóru á leiðina, men tá var Krossteinur sokkin, skrivar Vørn.

Manningin umborð á Krossteini hevur tað gott eftir umstøðunum og hevur fingið tilboð um kreppuhjálp.

Krossteinur liggur á 60 til 70 metrar dýpi, og støða er ikki tikin til, um báturin verður tikin upp aftur, sigur Regin Jacobsen, stjóri á Bakkafrosti.