Líka nógvur svartkjaftur sum í fyrraárið

Fyribilsúrslit vísa, at líka nógvur svartkjaftur er í føroyskum sjógvi sum i 2019. Eingin kanning varð gjørd í fjør.

Jákup Sverri er júst liðugur at kanna svartkjaft sunnan fyri Føroyar og í norðara parti í gýtingarøkinum, upplýsir Havstovan. 

Sunnan fyri markið var svartkjafturin eystanfyri, fram við írsku og skotsku hellingini, og sera lítið úti á djúpum sjógvi.

Ringa veðrið gjørdi, at ikki bar til at kanna økið eystan fyri Føroyar í ár. 

Blandað stødd

Støddin var blandað. Trý ára gamal og eldri fiskur var suðuri við Hebridurnar og tvey ár og eldri fiskur sunnan fyri Wyville Thomson ryggin. 

Í bankarennuni norðan fyri ryggin var meginparturin óbúgvin eitt til trý ára gamal fiskur.

Kanningin hjá Havstovuni er skipað sum altjóða felags kanning undir ICES, har Føroyar eru við saman við Noregi, Írlandi, Niðurlondum og Spania. 

Í næstu viku verður roknað út, hvussu nógvur svartkjafturin er.