Støðan er góð, men verri enn í 2007

Hóast støðan hjá landskassanum í løtuni er góð, er hon í roynd og veru verri, enn hon var í 2007, beint áðrenn fíggjarkreppan rakti.

Sum nú er, tykist korona at hava verið sum ein fyribils stoytur, heldur enn ein kreppa.

Men verður ein slíkur stoytur størri og longri, er vandi fyri, at Føroyar verða niðurrataðar eins og í 2011, tá landskassin í sambandi við fíggjarkreppuna fleiri ár á rað hevði hall í fíggjarlógini. 

Tað sigur Landsbankin í ársfrágreiðing sínari um fíggjarligt støðufesti.

Men samanumtikið eru ikki tekin um, at váðar, sum kunnu ávirka fíggjarliga støðufestið, í løtuni eru í umbúna í føroyska búskapinum og bankageiranum. 

Nettoognin eigur at vera størri

Men skulu Føroyar ikki hava verri rating í sambandi við eina komandi niðurgongd, skal nettoognin vera nógv størri enn hon var í 2007, tað vil siga nógv størri enn null kr., sigur Landsbankin.

Bæði fyri kreppurnar í 90unum og í 2008 vuksu útlánini skjótari enn búskapurin. Veksa útlánini skjótari enn búskapurin, kann tað vera eitt tekin um fíggjarligan óstøðugleika. 

Men síðani eru útlánini ikki vaksin so skjótt sum búskapurin, sigur Landsbankin.

Hetta kann partvíst skyldast, at kapitalkrøvini, sum bankarnir skulu lúka, eru herd, og at fyritøkurnar eru so mikið væl fyri í dag, at eftirspurningurin eftir fígging er lítil, heldur Landsbankin.