Løgtingið til hús í næstu viku

Ætlanin er framvegis, at løgtingið skal fara til hús um eina viku, hósdagin í næstu viku.

Nógv mál eru eftir at avgreiða, men tíðarætlanin er tann sama, sigur Jógvan á Lakjuni, løgtingsformaður.

Hann veit ikki um, at nakað mál er á veg í tingið nú.

Og seinasta fyrsta viðgerð var týsdagin, tá uppskotið um eykajáttanarlóg varð viðgjørt. Tað uppskotið er tingmál nummar 141 í hesari tingsetuni.

27 mál í nevnd

Enn eru 27 mál í nevndunum. Tað, sum hevur verið longst, fór í nevnd 8.oktober.

Á tingfundinum í gjár komu níggju álit úr nevndunum.

Tingfundur er í dag kl.13.30. Níggju aðru viðgerðir eru á skránni.

Tingfundur er eisini í morgin og mánadagin, týsdagin, mikudagin og hósdagin í næstu viku.

Mánadagin verður aðalorðaskifti um uttanríkismál.