WHO: Korona breiðir seg skjótari enn nakrantíð

Tað tykist at vera torført at fáa tamarhald á koronusmittuni, og hon breiðir seg skjótari enn nakrantíð, upplýsir heimsheilsustovnurin, WHO.

Í farnu viku vórðu 5,5 milliónir fólk smittað við koronu, og tað er tað mesta nakrantíð, upplýsir heimsheilsustovnurin.

Í londum sum Argentina, Brasil og Turkalandi breiðir smittan seg skjótt, og líkt er til, at India hevur mist tamarhaldið á smittuni, sum veksur fyri hvønn dag.

Kann steðga framgongdini

Flemming Konradsen, professari í fólkaheilsu á universitetinum í Keypmannahavn, sigur, at tað er neyðugt at taka gongdina í størsta álvara, tá smittan breiðir seg so skjótt í londum, har nógv fólk býr. Tað kann vera við til at steðga framgongdini í heiminum, sum øll bíða eftir, sigur hann.

Gongdin kann hava við sær, at eftirspurningurin eftir vørum og tænastum í londunum kann minka, og at vørur og tænastur, sum skulu latast øðrum londum, koma ikki

Og so kann gongdin eisini hava við sær, at onnur sløg av koronu fara at taka seg upp, og tað kann gerast ein trupulleiki, tí koppingarevni, sum nú verður nýtt í USA og í Evropa, fer ikki at rína við nýggju sløgini av koronu, sigur professarin.