Skulu fáa somu løn og eftirløn sum nú

Løgmaður og landsstýrisfólkini eiga at fáa somu løn og eftirløn, sum tey nú fáa nú.

Tað er tilmælið hjá nevndini, sum hevur viðgjørt samsýning og eftirløn hjá teimum í landsstýrinum.

Sambært lóg frá 2003 skal løgmaður hvørt valskeið seta nevnd at gera tilmæli um samsýningar og eftirløn hjá  landsstýrisfólkum.

Fimta álitið

Tað tilmælið er nú gjørt og latið løgmanni. Hetta er fimta álitið av sínum slagi. 

Fyri at tryggja eina óhefta nevnd, heitti løgmaður á føroysku limirnar í dómaratilnevningarnevndini um at tilmæla, hvørji fólk skuldu veljast í nevndina.

Í nevndini vóru Ester Dahl, Óli Meinertsson Hansen og Christian Danielsen. Ester Dahl var forkvinna.

Ráðharrabilur

Nevndin mælir til, at verandi skipan heldur fram á flestu økjum.

Men nevndin mælir tó til, at løgmaður og landsstýrisfólk skulu hava ráðharrabil tøkan.

Nærri reglur skulu ásetast í kunngerð um samskiftisútreiðslur hjá landsstýrisfólkum, og øll løn skal mótroknast í fráfaringarlønini, um so er, at fráfaringarløn verður latin fyri eitt tíðarskeið, sum er longri enn tríggjar mánaðir.