Skifta nú graslíkið á Ovara vølli

Fríggjadagin byrjaði arbeiðið at taka graslíkið á Ovara vølli í Gundadali av aftur.

Tað er minni enn eitt ár síðani, at nýtt graslíki varð lagt á vøllin, og nú skal tað longu takast av aftur.

Orsøkin er, at fótbóltsfeløgini, sum brúka vøllin, siga, at bólturin ferðast skeivt á vøllinum, og at vøllurin ikki kann brúkast.

Arbeiðið at taka graslíkið av Ovara vølli aftur, verður væntandi liðugt 25. mai, sigur kommunan.

Feløgini hava umlagt virksemið í Gundadali, meðan arbeitt verður, og nakað av virkseminum er eisini flutt til aðrar vøllir í kommununi.