Níggju børn innløgd á Psykiatrisku deild

Til 7.mai í ár vóru níggju børn innløgd á Psykiatrisku deild á Landssjúkrahúsinum. 

Hetta eru fleiri enn í fjør og í 2019. Í fjør vóru tey fýra og í 2019 vóru tey átta.

Børnini eru 13 til 17 ára gomul.

Hetta sæst í svari frá Kaj Leo Holm Johannesen, landsstýrismanni, til Sirið Stenberg, løgtingskvinnu, sum spurdi um  barnapsykiatriska dagtilboðið.

Toymisleiðari setast

Landsstýrismaðurin svarar, at nú Familjudepilin kemur í Sjúkrahúsverkinum, kemur ein sálarfrøðiligur toymisleiðari afturat í dagtilboðnum.

Royndirnar hjá Sjúkrahúsverkinum eru, at dagtilboðið bæði kann brúkast til drúgvari daginnleggingar, men eisini til víðkaðar ambulantar sjúklingagongdir hjá eitt nú teimum, sum hava etingarólag.  

Seinnu árini hevur psykiatriin sæð nógv børn, sum mangla umsorgan.

Dageindin kom í oktober í 2019. 27 børn og ung hava verið til greiningar og viðgerð her.

Nú eru so nógvar ávísingar, at bíðitíðin er vorðin longri.