Politiskt ábær fólk skulu skrásetast

Peningastovnarnir í Føroyum hava brúk fyri einum lista við politiskt ábærum fólki.

Tí er ein kunngerð - hon er donsk - á veg um hetta.

Uppskotið um kunngerð er til hoyringar í løtuni.

Kunngerðin byggir á lógina um at hvítvaska pengar og fíggja yvirgang.

PEP-listi

Kunngerðin loyvir peningastovnum at hava ein lista við viðskiftafólkum, sonevndan PEP-lista, sum kom í Danmark í 2019.

Hetta er listi við fólkum, sum eru mett at vera politiskt ábær, sum tað eitur. 

Sagt verður, at peningastovnarnir í Føroyum hava trupult við at avgera, hvørji viðskiftafólk teirra eru politiskt ábær.

Kunngerðin eitur "indberetning og offentliggørelse af oplysninger om politisk eksponerede personer på Færøerne."

Skulu boða frá

Løgtingið, Landsgrannskoðanin, aðalráðini og almennar fyritøkur skulu boða frá um politiskt ábær fólk.

Tey skulu so á ein lista, sum Fíggjareftirlitið almannakunnger. Og sum peningastovnarnir so kunnu brúka.

Kunngerðin skal koma í gildi 1. september í ár. Hoyringarfreistin er til 17. juni.