Hava nú samrøður við umsøkjarar

Tilgongdin at seta nýggjan kommunustjóra í Klaksvíkar kommunu heldur fram.

Í løtuni hevur kommunan samrøður við fólk, ið hava søkt starvið, sigur Karl Johansen, borgarstjóri.

Málið um nýggja kommunustjóran í Klaksvík skal fyri á næsta býráðsfundinum, sum verður 24. juni, og tá verður avgjørt, hvør verður settur í starvið.

Hevur drigið út

Tað hevur annars drigið út, at seta nýggjan kommunustjóra í Klaksvík.

Fyrst í mars søkti kommunan eftir kommunustjóra, men tá valdi kommunan at endurlýsa starvið, tá átta umsóknir komu til starvið.

Tá seinna umsóknarfreistin var úti mánadagin 3. mai, fekk Klaksvíkar kommuna 20 umsóknir til starvið. Og tað eru tær samrøðurnar, sum í løtuni verða hildnar undan næsta býráðsfundinum, sum verður um fýra vikur.