Samtyktu at broyta byggisamtykt fyri Fossdalsgjógv

Tórshavnar býráð hevur samtykt at broyta serstøku byggisamtyktina fyri Fossdalsgjógv við Velbastað, so Koks kann sleppa at byggja har.

Eitt uppskot frá meirilutanum í Byggi- og býarskipanarnevndini varð samtykt.

11 býráðslimir atkvøddu fyri, Elsa Berg atkvøddi ímóti, og Annfinn Brekkstein atkvøddi blankt.

Treytin í uppskotinum er, at loyvi fæst frá avvarðandi myndugleikum. 

Og ein áseting um, at økið ikki skal hegnast inni, skal upp í serstøku byggisamtyktina.

Býarskipanarnevnd landsins ger tilmæli

Samtykta uppskotið um at broyta byggisamtyktina verður nú saman við mótmælum og viðmerkingum sent Býarskipanarnevnd landsins, sum ger tilmæli til landsstýrismannin í kommunumálum, Helga Abrahamsen. 

Hann tekur síðani avgerðina um serstøku byggisamtyktina.

Fimm mótmæli og viðmerkingar komu um ætlanina at broyta serstøku byggisamtyktina fyri Fossdalsgjógv.