Vesturheimurin vardur, men smittan rakar fátæk

Stjórin í heimsheilsustovninum, WHO, Tedros Adhanom Ghebreyesus, stúrir fyri tí, sum hann nevnir farsótt í tveimum sporum.

Vesturheimurin verður vardur, meðan smittan rakar hart í fátæka partinum av heiminum.

Sambært Tedros, er tað órættvísa býtið av koppingarevnum, sum er orsøkin til tvíbýtið.

- Háinntøkulondini hava tikið 44 prosent av øllum skamtum í heiminum, láginntøkulondini 0,4 prosent. Og tað ørkymlar meg nógv, at støðan ikki er broytt í fleiri mánaðir, sigur hann.

Gera koppingarevni í Afrika

Tedros segði eisini, at hann vónar, at menningin av koronukoppingarevni verður sett í verk í afrikanska meginlandinum, og at fortreytir eru fyri, at framleiðslan kann byrja seint í ár. Hann nevndi tó einki ávíst land.

Tíðindastovan, Reuters, hevur fyrr sagt, at Senegal kann fara undir framleiðslu av koronukoppingarevni næsta ár, og tað verður í samstarvi við belgiska felagið, Univercells.

Tedros heitti á m.a. framleiðararnar, Pfizer og Moderna, um at býta sína vitan við covid-19-bólkin fyri atgongd til tøkni hjá WHO.

Endamálið hjá bólkinum er at seta ferð á arbeiðið at geva týdningarmikla tøkni í stríðnum móti farsóttini.