Ferðavinnufyritøkur kunnu nú søkja um hjálp

Nú kunnu ferðavinnufyritøkur søkja úr hjálparpakka 4.

Helgi Abrahamsen, landsstýrismaður, hevur í dag lýst kunngerðina, sum ger tað møguligt hjá fyritøkum í ferðavinnuni at søkja um stuðul úr hjálparpakkanum.

Sambært lógini kann ein fyritøka, har afturgongdin í umsetninginum hevur verið í minsta lagi 40 prosent, fáa stuðul úr hjálparpakkanum.

Hevur afturgongdin verið millum 40 og 60 prosent, er stuðulin helvtin av føstu útreiðslunum, og hevur afturgongdin verið millum 60 og 100 prosent, er stuðulin 75 prosent av føstu útreiðslunum.

27.000 kr. fyri hvørt starvsfólk

Sambært kunngerðini, sum nú er lýst, kann stuðulin til lønarútreiðslur til kjarnustarvsfólk í mesta lagi vera fyri 10 starvsfólk við fullum starvsbrøki í hvørjari fyritøku, og í mesta lagi 27.000 kr. fyri hvørt starvsfólkið um mánaðin.

Fyritøkan, sum fær stuðul, skal grundgeva fyri, at starvsfólkini, sum stuðulin verður latin fyri, eru neyðug fyri virksemið hjá fyritøkuni.

Freistin at søkja um stuðul úr hjálparpakka 4 er 1. juli.