Vil hava harðari revsing - fer í landsrættin

Ákæruvaldið fer í Landsrættin við málinum um ein 17 ára gamlan mann, sum í Føroya rætti var dømdur fyri kynslig brotsverk.

Maðurin fekk 10 mánaða treytaleysa fongsulsrevsing í Føroya rætti.

Ákæruvaldið vil hava harðari revsing.

Kravið hjá ákæruvaldinum í Føroya rætti var trý ára fongsulsrevsing, um herðingin í donsku revsilógini um revsing fyri neyðtøku eisini er í føroysku revsilógini og tvey ár, um herðingin ikki er í føroysku lógini.

Føroya rættur sigur, at herðingin er ikki galdandi í Føroyum.

Vil eisini royna ákæru um neyðtøku

Tann spurningurin er annars farin í Landsrættin í einum øðrum revsimáli, sum ikki er avgreitt har enn.

Maðurin var millum annað ákærdur fyri neyðtøku. Men hann bleiv frídømdur fyri neyðtøku.

Ákæruvaldið ætlar nú at royna ákæruna um neyðtøku í Eystari landsrætti.

Sjálvur hevur maðurin ikki skotið dómin inn fyri hægri rætt.