KOKS millum bestu matstovur í Evropa

Bara 38 matstovur í Evropa eru betri enn KOKS.

Tað stendur í nýggjum yvirliti fyri matstovur í Evropa, AOD, ella Opinionated About Dining, sum yvirlitið eitur. Har er KOKS við Poul Andrias Ziska sum høvuðskokki, nummar 39 yvir bestu matstovurnar í Evropa.

Í fjør var KOKS nummar 124 í sama yvirliti.

6.000 ummælarar

OAD-yvirlitið er bygt á 200.000 ummæli frá 6000 ymiskum ummælarum, sum hava skrásett seg sum ummælarar. 

OAD byrjaði í 2007, og hetta er triðja árið á rað, at KOKS er á hesum yvirliti. Og fyri fyrstu ferð  verður ein onnur føroysk matstova enn KOKS nevnd, tí aftrat sjálvum yvirlitinum nevnir OAD eisini matstovur, sum tey viðmæla, men sum ikki sleppa upp í part í endaliga yvirlitið. Har er BARBARA við Teiti Christensen í køkinum nevnd.

Nummar eitt á listanum hjá OAD er danska matstovan Alchemist, sum eins og KOKS hevur tvær Michelin-stjørnur.