Eingin ætlan at broyta heimauppihaldið

Heimauppihaldið er ongantíð slept, men tað var lagað til fyri einum mánaði síðani, soleiðis at tey, sum ikki er koppsett, hava fingið fríari ræsur.

Sum støðan er í løtuni, er ikki ætlanin at broyta heimaupphaldið aftur. Landsstýrið fylgir gongdini, og vísir tað seg verða neyðugt at endurskoða galdandi skipanir, verður tað gjørt.

Tað sigur Bárður á Steig Nielsen, løgmaður, í svari til Sirið Stenberg, løgtingskvinnu, sum hevur spurt um málið.

Hvørja ferð stig eru tikin at broyta tilmælini, hava heilsufakligu myndugleikarnir eisini sagt sína hugsan.

Bárður á Steig Nielsen, løgmaður

Løgmaður sigur, at einastu avmarkingarnar fyrstu fýra dagarnar eru at halda seg frá størri mannfjøld, har smittan kann nørast skjótt, t.d. føðingardøgum, veitslum, náttarlívi, kirkju og samkomum og størri ítrótta- og tónleikatiltøkum.

Góð smittugongd

Landsstýrið tók hetta stigið, tí smittugongdin var góð, og fleiri verða koppsett.

Samstundis varð skipað fyri, at tað ber til at lata seg kanna allar dagarnar í vikuni.

Løgmaður sigur, at síðani mars í fjør hevur koronupolitikkurin hvílt á javnvág millum heilsufaklig atlit og samfelagsatlit.

Hvørja ferð stig eru tikin til at broyta tilmælini, hava heilsufakligu myndugleikarnir eisini sagt sína hugsan. 

Heilsufakligi myndugleikin varð eisini spurdur til ráðs, tá heimauppihaldið varð tillagað, sigur Bárður á Steig Nielsen í svarinum til Sirið Stenberg.

Sirið Stenberg, Løgtingið, løgtingsfundur, løgtingssfólk, politikkur, tjóðveldið, Tjóðveldisflokkurin