Juni var heitasti mánaður í søgu USA

Í gjár vórðu mátað 47,2 hitastig í Las Vegas, og í oyðimørkini, Death Valley, var hitin 54 stig fríggjadagin, sambært veðurtænastuni, National Weather Service. Í 1913 vóru 57 hitastig mátað í Death Valley, - tað  hægsta, sum nakrantíð er mátað á jørðini. 

Umleið 500 km. í útnyrðing úr oyðimørkini eru stórir skógareldar í Kalifornia, - nærindis markinum til Nevada. Eingi tekin eru um, at eldurin minkar í skógarlendinum kring Sierra Nevada, og fríggjadagin og leygardagin breiddi eldur seg til tvífalt so stórt øki. 

Nógvur vindur saman við ógvusligum hita ger arbeiðið hjá sløkkiliðum trupult. Heitt verður á íbúgvar um at brúka minni vatn og streym. 

Hitamátingar eru gjørdar í USA í 127 ár, og juni í ár er heitasti mánaður í søgu USA, skrivar AP.