Hellutangi stendur enn

- Vit hava gjørt tað, ið serfrøðingarnir hava rátt okkum til, men hetta hevur ikki verið nóg mikið. Nú fara vit at meta um, hvat gerast kann.

Tað sigur Atli Gregersen, stjóri í Hiddenfjord, um støðuna við fóðurflakanum Hellutanga.

Aftur í gjár varð roynt at flota fóðurflakan tvær ferðir.

Blástu luft 

2.000 tons av uppdrift fingust við at blása luft í m.a. lastina og síðutangar. Eisini vórðu boyur festar á afturskipið.

Atli Gregersen sigur, at tey væntaðu, at hetta varð nóg mikið til at flota flakan og toga hann av. Gronin og helvtin av flakanum fóru uppfrá, men afturskipið hekk eftir. 

Á flóðini fyrrapartin varð roynt at hála Hellutanga út eftir reyvini, og á flóðini í gjárkvøldið varð roynt at toga hann út eftir gronini.

Bóru ikki á mál

Gøtunes hjá Varðanum, Samson og Pressarin hjá MEST umframt Brimil settu á við fullari megi, men hvørgu ferðina flutti flakin seg. Tískil bóru royndirnar í gjár heldur ikki á mál.

- Vit hava nú gjørt tað, ið okkara serfrøðingar hava rátt okkum til. Hetta hevur tíverri ikki verið nóg mikið, og vit fara nú at meta um, hvat gerast kann, sigur Atli Gregersen, stjóri í Hiddenfjord, í tíðindaskrivi seinnapartin. 

>>SAMRØÐA VIÐ ATLA GREGERSEN Í TÍÐINDUNUM.