- Tíðindi, mentan og ítróttur
Seinasta blaðið prentað á Prentmiðstøðini fríggjadagin
Norðlýsið verður framvegis prentað í Føroyum, hóast Prentmiðstøðin gevst fríggjadagin.
Blaðið verður prentað hjá Føroyaprenti, á glanspappíri, sum hevur verið brúkt seinastu ferðirnar, blaðið er komið.
Norðlýsið varð prentað í Danmark fyri nøkrum árum síðani, tað var hjá Dansk Avistryk.
Biðið varð eisini um tilboð haðani hesaferð.
Men tað kostar ikki meira at fáa blaðið prentað hjá Føroya prenti, og glanspappírið er nógv betri enn vanligt avíspappír, sigur Jóhann Lutzen, blaðstjóri.
Serbløðini, sum eru størri enn 16 síður, verða tó væntandi prentað í Danmark.
Í Danmark
Dimmalætting verður prentað í Danmark, stendur í oddagrein blaðsins í síðstu viku.
Sosialurin verður eisini prentaður í Danmark.
Fyrsta blaðið, sum verður prentað í Danmark, kemur fríggjadagin í næsta viku.
Seinasta blaðið, sum verður prentað hjá Prentmiðstøðini, verður prentað seinnapartin fríggjadagin, sigur Eirikur Lindenskov, ábyrgdarblaðstjóri.
Tað er Sosialurin, sum kemur í hvørt hús mánadagin.
Fyrsta blaðið varð prentað í Føroyum 13.mai í 1852.