Umvæla Stokkastovuna við norskum granntrøum

150 ára gomul norsk granntrø skulu brúkast til at umvæla Stokkastovuna í Tinganesi.

Trøini vórðu feld í mai.

Stokkarnir verða førdir til Føroya í ár og goymdir, so teir eru tøkir tíðliga næsta ár. 

Løgtingið hevur játtað 6,5 mió. kr. til umvælingina, sum væntast at vera liðug í 2024.

Grundin skal styrkjast, og flag verður lagt á tekjuna á Stokkastovuni. 

Samstarv við Noreg og Svøríki

Verkætlanin verður framd í samstarvi við norska ríkisantikvarin, universitetið í Göteborg og svenskar handverkarar, sum eru serfrøðingar í tílíkum umvælingum. Føroyskir handverkarar verða eisini við í arbeiðinum, stendur í ískoytispartinum til røðuna, sum løgmaður helt í løgtinginum í gjár.

Har stendur eisini, at almenningurin skal kunna fylgja arbeiðinum bæði á staðnum og við kunnandi tilfari, sum verður tøkt á heimasíðuni hjá Løgmansskrivstovuni.

Heildarætlan fyri umbygging í Tinganesi varð gjørd í 2009, og er nú dagførd við teimum umvælingum, sum eru framdar, og við nýggjum kostnaðarmetingum.