Bara fýra fleiri búpláss í fimm ár

Bara fýra fleiri búpláss vóru á ellis- og røktarheimunum kring landið í fjør enn í 2015.

Talið á búfólkum er heldur ikki broytt hesi árini. Tey vóru 621 í 2015 og 620 í fjør, vísa tøl frá Hagstovuni.

Sama tíðarskeið vaks talið á teimum, sum eru 67 ár og eldri, 1.097 fólk. Og talið á teimum, sum eru 80 ár og eldri, er vaksið 105 fólk.

Átta samstarvsøki

Kommunurnar umsita eldraøkið, og tilsamans eru átta kommunal samstarvsøki kring landið.

At fólkatalið veksur, samstundis sum talið á búplássum broytist lítið og einki, sæst eisini aftur í yvirlitinum hjá Hagstovuni.

Í 2015 vóru 8,9 búpláss fyri hvørji 100 fólk, sum eru 67 ár og eldri. Í fjør var hetta talið minkað niður í 7,8.

Tey flestu eru 85 ár og eldri

Tey flestu, sum búgva á ellis- og røktarheimi og sambýli, eru 85 ár og eldri. 

Kynsbýtið er nøkulunda javnt upp í 80 ára aldur. 

Men í aldursbólkinum 85 ár og eldri eru nógv fleiri konufólk enn mannfólk, 275 konufólk og 105 mannfólk, vísa tølini hjá Hagstovuni. 

>>>Les meira um hagtølini her<<<