Suðuroyartunnilin: Nógvar kanningar eftir at gera

Politiska ætlanin er, at tað verður koyrandi í Suðuroyartunlinum í 2030. Men enn er ov tíðliga at siga við vissu, um tann ætlanin heldur.

Tað sigur Jørgen Niclasen, landsstýrismaður í samferðslumálum, sum hevur svarað einum fyrispurningi frá Sirið Stenberg, løgtingskvinnu.

Jørgen Niclasen sigur, at enn er støða ikki tikin til, nær flokkarnir verða kallaðir saman at viðgera verkætlanina um Suðuroyartunnilin. Fleiri viðurskifti kunnu illa viðgerast, fyrr enn fleiri forkanningar og fyrireikingar eru gjørdar, og ein trygdarmeting er gjørd av tunlinum.

Undankanningarnar og fyrireikingarnar í sambandi við Suðuroyartunnilin ganga eftir ætlan. Kanningarnar eru ikki liðugt greinaðar enn. Neyðugt verður at kanna úrslitini betur og at kanna úrslitini frá jarðfrøðiligu kanningunum í fjør og í ár saman.

Búskaparligi parturin

Arbeitt verður eisini við at kanna búskaparliga partin av verkætlanini við samfelagsligum-, kostnyttu- og CO2-greiningum. Ætlanin er eisini at kanna møguligar fíggingarleistir. Í sambandi við tunnilin er eisini neyðugt at gera eina trygdarmeting (váðameting), náttúru- og fornfrøðikanningar, og ætlan er eisini at byrja tað arbeiðið í ár, sigur Jørgen Niclasen.

Jørgen Niclasen

Tað ber ikki til at siga við vissu, nær klárt verður at bora Suðuroyartunnilin. Tað veldst um kanningarnar, sum eru eftir at gera, og hvussu tað fera at ganga at fíggja verkætlanina og at projektera tunnilin.

Fimm milliónir kr. eru settar av til forkanningar og fyrireikingar, og landsstýrið hevur á langtíðarløguætlanini sett 100 milliónir. kr. av um árið frá 2025 til partafelagið, ið eftir ætlan skal standa fyri verkætlanini, sigur Jørgen Niclasen í svarinum til Sirið Stenberg.

Sirið Steenberg