Innflutningurin vaks 300 mió. kr. fyrra hálvár

Føroyar innfluttu meira í fyrra hálvári í ár enn í fjør.

Innflutt varð fyri 4,2 milliardir krónur í fyrra hálvári, sum eru 300 milliónir krónur meira enn í fyrra hálvári í fjør. Vøksturin er 7,6 prosent.

Innflutningurin til byggivirksemi er minkaður, men í flestu hinum vørubólkunum er vøkstur, upplýsir Hagstovan.

Útgerð til vinnuna

Størsti vøksturin er í bólkinum maskinur og onnur útgerð til vinnuna. Har er vøksturin 44 prosent. Í bólkinum, sum eitur vørur til húsarhaldsnýtslu, er vøksturin 12 prosent.

Oljuprísurin er farin upp aftur í ár.

Og hóast 11 prosent minni brennievni vórðu innflutt í fyrra hálvári í ár enn í fjør, er innflutt fyri knappliga 17 prosent fleiri krónur, 80 milliónir krónur.