Rakettverja forðaði fyri álopi í Kabul

Ein rakettverja forðaði í nátt fyri einum rakettálopi í afganska høvuðsstaðnum, Kabul. Tað boðaðu amerikansku myndugleikarnir frá í morgun.

Rakettirnar skuldu eftir øllum at døma raka Hamid Karzai-floghavnina í Kabul, har túsundtals afganar og fleiri útlendskir hermenn eru staddir.

Amerikanski herurin hevur seinastu dagarnar steðgað fleiri yvirgangsálopum í Kabul.

200 fólk doyðu

Hósdagin var yvirgangsálop framt á Hamid Karzai-flogvøllin, og fleiri enn 200 fólk lótu lív, flestu teirra afganar, sum royndu at sleppa úr landinum.

13 av teimum deyðu vóru amerikanskir hermenn.

Amerikanski forsetin, Joe Biden, ávaraði tá um, at ítøkiligar hóttanir eru um yvirgangsálop móti flogvøllinum. 

Ein deild undir Islamskum stati, IS-K, hevur tikið ábyrgdina av yvirgangsálopinum.