Ákærdur fyri samlegu við sína egnu dóttur

11 revsilógarbrot og eitt brot á kunngerðina um rúsevni eru í ákæruritinum móti einum manni, sum í hesum døgum er í Føroya rætti.

Maðurin er ákærdur fyri blygdanarskemd, fyri samlegu og annað kynsligt samband enn samlegu við sína egnu dóttur, sum var yngri enn 12 ár, hon er fødd í 2017. 

Í ákæruritinum er tíðarskeiðið, hetta skal vera hent, frá 31.mai 2018 til 21.august 2020.

Ákærur eru eisini um av órøttum at hava tikið myndir, fyri at hava barnaporno og fyri at hava 21,56 gramm av hashi. 

Umframt egnu dóttur sína, er maðurin ákærdur fyri at hava gjørt seg inn á bróðurdóttur ella systurdóttur sína, sum er fødd í 2009, tað skal vera hent í 2019 og 2020.

Myndir og filmar

Í sambandi við barnaporno, sigur ákæruritið, at talan er um 122 myndir og 174 filmsbrot.

Maðurin játtar seg sekan í onkrum ákærum, men noktar seg sekan í grovu ákærunum.

Hann hevur verið í varðhaldi í skjótt 11 mánaðir.

Maðurin varð tikin 12.oktober í fjør, tá hann kom til Havnar við Norrønu. Hann varð tikin, tí hann royndi at smugla hash.