Venjingar skulu eisini vera uttan fyri Sjúkrahúsverkið

Áhaldandi venjingin hjá parkinsonsjúklingum eigur at vera aðrastaðni enn í Sjúkrahúsverkinum, t.e. í Almannaverkinum, um sjúklingurin er undir 67 ár, og við tilboði frá kommununum, um sjúklingurin er eldri enn 67 ár.

Tað sigur Kaj Leo Holm Johannesen, landsstýrismaður í heilsumálum, í svari til Eyðgunn Samuelsen, løgtingskvinnu.

Venjingartilboðið til parkinsonsjúklingar varð sett í verk á Suðuroyar sjúkrahúsi í fjør. Pláss er fyri fyri átta sjúklingum á hvørjum skeiði, sum er tvær vikur. Tey, sum hava verið á hesum skeiði, eru millum 40 og 80 ár.

Tá skeiðið er liðugt, fáa sjúklingarnir ætlan fyri, hvussu teir framhaldandi skulu venja í nærumhvørvinum. Og tríggjar mánaðir seinni koma sjúklingarnir aftur á Suðuroyar sjúkrahús til ein framhaldsdag, har mett verður um, hvussu tað hevur gingið við venjingunum. 

Intensivt skeið

Landsstýrismaðurin í heilsumálum sigur, at ætlanin er at menna eitt intensivt rehabiliteringsskeið á Suðuroyar sjúkrahúsi í eina viku, í samstarvi við primera geiran um viðlíkahald eftir uppihaldið á Tvøroyri. Men enn er ikki orka til henda bólkin av parkinsonsjúklingum.

Mett verður, at slík skeið eiga at vera í Sjúkrahúsverkinum, men áhaldandi venjingin eigur at vera uttan fyri Sjúkrahúsverkið, eins og gjørt verður í øðrum londum, sigur Kaj Leo Holm Johannesen í svarinum til Eyðgunn Samuelsen.