Dótturfelag skal standa fyri verkætlan í Runavík

Sp/f í Leitinum er navnið á nýggja dótturfelagnum hjá danska felagnum St. Jørgen Ejendomme, sum skal standa fyri verkætlanini at byggja 130-150 leiguíbúðir í Runavík.

Tað eru føroyingar, sum standa á odda fyri nýggja felagnum.

Johannus Gunnar Egholm Hansen er nevndarformaður í sp/f í Leitinum, og Rune Bro Róin er stjóri í felagnum og næstformaður í nevndini. 

Thomas Lund og Michael Lind eru nevndarlimir.

Sambært skrásetingini er endamál felagsins at gera íløgur, byggja og reka fasta ogn umframt annað virksemi í hesum sambandi.

50.000 kr. 

Partapeningurin í felagnum er 50.000 krónur.

3. september skrivaði St. Jørgen Ejendomme undir eina prinsippavtalu við Runavíkar kommunu um at keypa sjey grundstykki, har ætlanin er at byggja 130-150 leiguíbúðir. 

Fíggjarætlanin fyri verkætlanina er um 450 milliónir krónur. 

Tær fyrstu 30 íbúðirnar skulu vera klárar at flyta í við ársbyrjan 2024.