Tvey feløg ætla at keypa uppsjóvarskip

Bæði feløgini hava fingið at vita úr Fiskimálaráðnum, at tey fáa 3.000 tons av makreli, 4.000 tons av sild og 9.000 tons av svartkjafti.

John Mikkjal Godtfred, sum er ein av stigtakarunum til felagið Ango í Vági, sigur, at tey arbeiða við at fáa eitt skip til vega, men hvat skip talan verður um, er ikki greitt enn.

Hann sigur, at felagið fekk minni kvotu, enn søkt var um, og tí mugu øll viðurskifti endurskoðast.

Hildið verður kortini fram við ætlanini, men enn ber ikki til at siga nakað ítøkiligt um ætlanina, sigur John Mikkjal Godtfred.

Felagið Gráasteinur, arbeiðir eisini við ætlanini, nú loyvini eru komin.

Ein av stigtakarunum til felagið, Birgir Lútzen, sigur at eisini tey arbeiða við at fáa eitt skip til vega, men enn er einki endaligt komið upp á pláss. Og av tí sama sigur hann seg ikki kunna siga nakað ítøkiligt um ætlanina.

Stórur áhugi fyri kvotunum

Fyri at fáa lut í kvotunum, skuldu umsøkjarar annaðhvørt hava skip, ella hava fingið eina avtalu við onnur skip um at fiska kvotuna.

Stórur áhugi var fyri at søkja um kvotur til vinnuligar royndir og verkætlanir. Tær vóru tilsamans 51.

Fiskimálaráðið upplýsir, at 14 umsóknir vóru til ítøkiligt skipakeyp.

30 umsóknir vóru til vinnuligar royndir og verkætlanir. Og sjey umsóknir vóru um ískoytiskvotur.

Rógvi Reinert, aðalstjóri í Fiskimálaráðnum, sigur, at ráðið hevur fyrst svarað teimum sum høvdu umsóknir um skipakeyp, og í vikuni fáa hinir umsøkjararnir boð.