Jeppe Kofod farin til Noreg at bíða eftir betri líkindum

Jenis av Rana, landsstýrismaður í uttanríkismálum, sigur, at tey ætla at royna aftur í kvøld. 

Lendur Jeppe Kofod í kvøld, verður politiska skráin óbroytt, men skráin fyri vitjanir verður avlýst, tí danski uttanríkisráðharrin nær ikki at vitja á Bakkafrosti. 

Talan er um árliga fundin hjá danska uttanríkisráðharranum við landsstýrismannin í uttanríkismálum og við uttanlandsnevndina hjá løgtingum. 

Viðurskiftini millum Føroyar og ES, langtíðarætlan um arktiska arbeiðið hjá Føroyum og Danmark, og samstarv á uttanríkis- og trygdarpolitiska økinum eru á skránni fyri fundin millum danska uttanríkisráðharran, Jeppe Kofod, og Jenis av Rana.

Uttanríkisráðharrin fer til Danmarkar aftur seinnapartin í morgin.