Kinesiski forsetin fer ikki á veðurlagstoppfund

Kinesiski forsetin, Xi Jingping, verður ikki við á ST-veðurlagsráðstevnuni í Skotlandi í næsta mánaði, skrivar The Times.

Blaðið sigur seg vita, at Boris Johnson, forsætisráðharri, hevur fingið boð um hetta frá kinesisku myndugleikunum.

Bretland er vertur fyri 26. ráðstevnuni um veðurlagsbroytingar, COP 26, sum verður í Glasgow frá 31. oktober til 12. november.

Times endurgevur ónevndar keldur fyri at siga, at tað er greitt, at kinesiski forsetin kemur ikki til Glasgow, og tað hevur forsætisráðharrin fingið at vita.

Blaðið skrivar, at henda avgerðin hevur fingið tey, sum leggja ráðstevnuna til rættis, at stúra fyri, at Kina fer ikki at góðtaka, at málsetningurin í veðurlagsmálum verður broyttur.

Fleiri enn 100 ríkis- og stjórnarleiðarar vera við á veðurlagsráðstevnuni.

Sambært París-avtaluni, sum varð gjørd í 2015, skulu heimsins lond fimtahvørt ár herða málini fyri CO2-útlát.