Tablett skal tálma koronu

Í tíðindaskrivi í dag sigur heilivágsframleiðarin, at kanningar eru gjørdar við einari tabeltt fyri koronu.

Tablettin eitur Paxlovid, og kann minka um vandan fyri at verða innlagdur ella at doyggja av smittuni við 89 prosentum, um tablettin verður tikin í seinasta lagi tríggjar dagar eftir sjúkutekin, skrivar Pfeizer.

Av teimum 389, sum fingu Paxlovid-tablettina, vórðu trý innløgd á sjúkrahús og eingin doyði. 385 fingu placebo - tvs. eina tablett við ongum í, og av teimum vórðu 27 innløgd og sjey doyðu við koronu.

Tablettin skal góðkennast

Sostatt vórðu 0,8 prosent av teimum, sum fingu Paxlovid, innløgd, og sjey prosent av teimum, sum fingu placebo, vóru innløgd.

Greiningin, sum er á øðrum og triðja stigi, kannar tablettina í vaksnum fólki, sum eru í stórum vanda fyri at gerast álvarsliga sjúk.

Pfizer ætlar skjótast til ber at lata amerikanska heilivágs-myndugleikanum, FDA, dátur til góðkenning.

"Úrslitini av kanningunum eru betri enn vit yvirhøvur tordu at droyma um," sigur Anneliesa Anderson, leiðari í Pfeizer, sambært New York Times.