Jørgen Niclasen: Eingin Sandoyartunnil, eingin Eysturoyartunnil

Jaspur Langgard, løgtingsmaður fyri Sambandsflokkin, ið býr á Nesi, spurdi Jørgen Niclasen, landsstýrismann í bæði fíggjar- og samferðslumálum, hvussu stórt tunnilsgjaldið í Eysturoyartunlinum hevði verið, um hann bara skuldi fíggja seg sjálvan og ikki eisini Sandoyartunnilin.

Jørgen Niclasen svarar avgjørdur, at Eysturoyartunnilin var neyvan komin, var hann ikki knýttur at Sandoyartunlinum.

Jørgen Niclasen sigur, at innskotið frá landinum til báðar tunlarnar varð tikið av løgujáttanini hjá landinum til Sandoyartunnilin.

Landið hevði einki sett av í langtíðarløguætlanini til Eysturoyartunnilin.

Ber ikki til at siga

Ikki ber til at siga neyvt, hvussu nógv tað hevði kostað at koyrt í Eysturoyartunlinum, um eingin Sandoyartunnil var, sigur Jørgen Niclasen.  

Í løtuni bendir einki á, at brúk verður fyri fleiri lánum til Eysturoyartunnilin og Sandoyartunnilin.

Eysturoyartunnilin kostar hálvaaðru milliard krónur og Sandoyartunnilin 1,2 milliardir.