Putin: Russland noyðist at brúka fleiri pengar til verjuendamál

Russland er noytt at nýta fleiri pengar til verjuendamál, og serliga at leggja dent á loftverjuna.

Tað segði russiski forsetin, Vladimir Putin, tá hann hiti herleiðarar og vápnaframleiðarar í russiska býnum, Sotji.

Sambært Putin er NATO beinleiðis orsøkin til, at Russland má økja um verjuna, tí virksemið hjá NATO kemur alsamt tættari at russiska markinum.

- Nú er eitt amerikanskt herskip farið inn í Svartahavið. Vit kunnu síggja tað í kikara, og vit kunnu sikta eftir tí, segði Putin um amerikanska herskipið, USS Mont Whitney, sum er í Svartahavinum.

Ísakalt millum Russland og vesturheimin

Tað hendir, samstundis sum viðurskiftini millum Russland og vesturheimin eru tey ringastu síðani kalda kríggið.

Russland hevur m.a. latið NATO-skrivstovuna í Brússel aftur, eftir at NATO vísti átta limum á skrivstovuni úr landinum, og samstundis skuldsetti tey fyri njósning.

- Vit verða noydd at menna okkara loft- og rúmdarverju, segði Vladimir Putin á fundinum, skrivar danska kringvarpið.