USA: Russar hava komið altjóða rúmdarstøðini í vanda

USA hevur fordømt Russland fyri at hava royndarskotið eitt nýtt vápn, sum USA sigur hevur sett manningina á altjóða rúmdarstøðini, ISS, í vanda og trygdina í rúmdini annars.

Russland royndarskeyt í gjár eina anti-fylgisveinarakett, og rakti í tí sambandi ein gamlan, óvirknan njósnarafylgisvein.

Royndarskjótingin sprongdi fylgisveinin, men vrakpetti av fylgisveininum sveima nú runt í rúmdini, og tað eru hesar leivdir, sum gjørdu, at manningin á ISS noyddist at lata seg í verjuhylki, sum kann brúkast, um manningin skal flytast niðuraftur á jørðina í eini neyðstøðu.

Til stóran ampa

Vrakpettini eru eisini til stóran ampa fyri fylgisveinarnar, sum eru í ringrás um jørðina.

Russiski rúmdarstovnurin, Roscosmos, vil tó vera við, at ongin vandi var á ferð, og sigur, at gamli fylgisveinurin ikki er í somu ringrás sum ISS.

Kina royndarskeyt eina líknandi skipan í 2007, sum eisini elvdi til stórar trupulleikar fyri aðrar fylgisveinar. Eisini í tí førinum vóru nógv vrakpetti, sum kunnu elva til stóran skaða, skrivar BBC.

Í løtuni eru sjey fólk altjóða á altjóða rúmdarstøðini, ISS.