Andstøðan: Landsstýrið hevur mist tamarhaldið á fíggjarstýringini

Javnaðarflokkurin, Tjóðveldi og Framsókn siga, at landsstýrið hevur mist tamarhaldið á figgjarstýringini, og tað, sum fer fram í løtuni, er fíggjarligt ábyrgdarloysi.

Andstøðuflokkarnir siga, at hóast valskeiðið bara er hálvrunnið, hevur samgongan økt raksturin hjá landskassanum 878 milliónir kr., og við hesari eykajáttanini hevur samgongan givið landsstýrinum heimild at brúka 200 milliónir kr. meira, enn játtaðar eru á fíggjarlógini.

Tá landskassin ikki megnar at hava stór yvirskot, tá samfelagshjólini mala við fullari ferð, bendir okkurt á, at hóttafall er fyri framman, sigaJavnaðarflokkurin, Tjóðveldi og Framsókn í álitinum til uppskotið um eykajáttan.

Biðja um góðar 108 mió. kr. 

Uppskotið hjá landsstýrinum um eykajáttan hevði góðar 108 milliónir kr. í halli.

Við broytingunum, sum meirilutin í fíggjarnevndini mælir til at gera, minkar hallið niður í góðar 100 milliónir kr. 

Atkvøtt verður um eykajáttanarlógina í tinginum týsdagin.