Magdalena Andersson er aftur forsætisráðharri

Magdalena Andersson varð í dag vald sum fyrsti kvinnuligi forsætisráðharrin í Svøríki.

Valið var tepurt, tí 101 ríkisdagslimir atkvøddu fyri henni, 75 atkvøddu ikki og 173 atkvøddu ímóti.

Svenska skipanin er, at um ikki minst helvtin av tinglimunum er ímóti, so er viðkomandi valdur. Og tí fekk Magdalena Andersson neyðuga meirilutan í dag.

Magdalena Andersson er fyrsti forsætisráðharri í 15 ár, sum fer at stjórna landinum við einum flokki, sosialdemokratiska flokkinum.

Magdalena Andersson, Svenskur forsætisráðharri

Frítekst tagging: 

Magdalena Andersson

svøríki

forsætisráðharri

Verður torført at stjórna

Fíggjarætlanin fyri 2022, er samtykt, men borgarliga andstøðan fekk nógv av sínum krøvum í fíggjarlógina.

Og tí verður mett, at tað verður torført hjá Magdalenu Andersson at stjórna Svøríki, til val verður næsta heyst.

Magdalena Andersson fer at almannakunngera nýggju stjórnina í morgin, segði hon á tíðindafundi eftir atkvøðugreiðsluna.

Magdalena Andersson, Svenskur forsætisráðharri

Frítekst tagging: 

Magdalena Andersson

svøríki

Aðruferð í eina viku

Hon hevur 100 av teimum 349 tinglimunum í ríkisdegnum aftan fyri seg. Og stjórnin verður mett at vera tann veikasta síðani í 1978, tá Ola Ullsten stóð á odda fyri eini minnilutastjórn, sum bert hevði 39 tinglimir.

Á tíðindafundinum viðgekk Magdlena Andersson, at neyðugt verður at fáa undirtøku frá øðrum flokkum í ríkisdegnum, og har vísti hon serliga á teir 75 tinglimirnar sum ikki atkvøddu í dag, sum kunnu taka undir við uppskotum sum stjórnin fer at leggja fram.

Hetta var aðru ferð í eina viku at Magdalena Andersson varð vald til forsætisráðharra í Svøríki.

Hon varð eisini vald mikudagin í farnu viku, men tá legði hon frá sær 7 tímar seinni, tí Umhvørvisflokkurin fór burturúr stjórnini.

Umhvørvisflokkurin segði seg ikki kunna góðtaka, at borgarliga andstøðan, og serliga Svøríkisdemokratarnir, fingu so stóra ávirkan í fíggjarlkógina fyri 2022.