Landsgrannskoðarin: Landsroknskapurin er ófullfíggjaður

Løgtingið fer í dag at atkvøða um landsroknskapin fyri 2020. 

Løgtingsgrannskoðararnir hava nógvar viðmerkingar um landsroknskapin í uppskotinum til samtyktar um at góðkenna hann.

Løgtingsgrannskoðararnir leggja serligan dent á, at landsroknskapurin er ikki fullfíggjaður, millum annað tí, at nakrir stovnar og grunnar eru ikki við í fíggjarlógini, landsroknskapinum ella í fíggjarstøðuni, og at tølini í nógvum roknskapum samsvara ikki við landsroknskapin.

TAKS manglar innaneftirlit

Løgtingsgrannskoðararnir vísa á, at innaneftirlitið hjá TAKS á nøkrum økjum er ikki nøktandi, millum annað í sambandi við  lønarhæddaravgjald, loyvisgjald á alivinnu og Barsilsskipanina.

Strandferðslan er farin í holt við eina KT-skipan uttan greiða kostnaðarætlan, uttan at bjóða skipanina út og uttan at gera skrivliga avtalu við veitaran.

Løgtingsgrannskoðararnir vísa eisini á, at fíggjarstýringin av útbyggingini av Landssjúkrahúsinum hevur ikki verið nøktandi, og at landsgrannskoðarin enn einaferð tekur fyrivarni í roknskapinum fyri serviðgerð uttanlands.

Tingfundurin í dag er kl.13.00.