Koronutilburðir í Danmark seta met

Koronutilburðirnir í Danmark seta met.

5.120 fólk vóru staðfest smittað í gjár, og tað er tað mesta higartil. Metið undan hesum var sett í desember í fjør, tá góð 4.500 fólk vóru smittað í eitt samdøgur.

Samlaða støðan er tó munandi øðrvísi nú, enn tá undanfarna metið var sett.

Talið á fólkum, sum eru innløgd fyri ella við koronu, er nú millum 400 og 500 fólk. Fyri einum ári síðani var talið á innløgdum 700, men um ársskiftið vóru 1.000 fólk innløgd við koronu.

Mette Frederiksen, forsætisráðharri, hevur boðað til tíðindafund um koronustøðuna kl.17 føroyska tíð.

Tá fer stjórnin at kunna um, at koppsetingarátakið verður økt, og eggja verður fólki til at fáa 2. og 3. prikið.

Stjórnin fer eisini at kunna um tað seinasta um nýggja omikron-frábrigdi, skrivar danska kringvarpið.