Mæla til at skerja toskaveiðuna 65 prosent næsta ár

01.12.2021 - 15:08
AktueltSamfelag
Mæla til at skerja toskaveiðuna 65 prosent næsta ár
ICES hevur kunngjørt tilmælini fyri høvuðsfiskastovnarnar undir Føroyum næsta ár
Havrannsóknarskipið Jákup Sverri. Ráðgevingin byggir á nýggjastu stovnsmetingarnar av hesum fiskastovnum.
 

ICES mælir til at skerja toskaveiðuna undir Føroyum 65 prosent næsta ár, niður í 2.206 tons, skrivar Havstovan.

Altjóða havrannsóknarstovnurin mælir eisini til at skerja hýsuveiðuna niður í 8.639 tons, ella 24 prosent samanborið við tilmælið fyri í ár.

Hinvegin heldur ICES tað vera ráðiligt at fiska 37.444 tons av upsa næsta ár, sum eru 37 prosent meira enn í ár.

 

Toskurin illa fyri

Toskastovnurin á landgrunninum hevur verið undir søguligum lágmarki síðani 2004.

Í 2018 og 2019 var toskastovnurin oman fyri lágmarksstøddina av gýtingarstovninum, men síðani 2020 hevur stovnsmetingin víst, at stovnurin aftur er undir hesum marki.

Hýsustovnurin var í tíðarskeiðnum frá 2008-2017 undir markinum, har serlig verjutiltøk eru neyðug. Hýsustovnurin kom upp um hetta markið í 2018, og hevur verið í vøkstri síðan. 

Upsastovnurin er toluliga væl fyri, og støddin á gýtingarstovninum er oman fyri tey mørk, har neyðugt er við verjutiltøkum, sigur ICES.

 

Daprar stovnsmetingar

Stovnsmetingarnar fyri tosk og hýsu, serliga framskrivingarnar, hava verið daprari tey síðstu tvey árini, enn tær vóru frammanundan.

Vánalig føðiviðurskifti í havinum síðani 2018 og meiri natúrligur deyði eru mett at vera orsøkir til, at stovnarnir ikki eru vaksnir so nógv sum væntað.

Stovnsmetingin fyri upsa hevur eisini í mong ár verið daprari enn tað, sum var mett árini frammanundan, tí nøgdin av smáum upsa hevur verið at sæð aftur í upsastovninum sum stórur upsi seinni, skrivar Havstovan.

Er kopiera
Nýggjastu sendingar í ÚV
Mánadag 23. mai
Avljóð og umljóð
139522
Mánadag 23. mai
Góðan morgun Føroyar 23.05.2022
139993
Mánadag 23. mai
Morgunlestur mánadagur 23.mai 2022
139978
Sunnudag 22. mai
Guðstænasta í Elduvíkar kirkju
139964
Nýggjastu sendingar í SV
Sunnudag 22. mai
Andaktin
139968
Sunnudag 22. mai
Guðstænasta í Elduvíkar kirkju
139969
Hósdag 19. mai
Sært tú meg 2:3
139885
Mánadag 16. mai
3-2
139731
Sunnudag 15. mai
Andakt við Andriasi Magnussen
139652