Suu Kyi dømd fýra ára fongsulsrevsing

Frákoyrdi forsætisráðharrin í Myanmar, Aung San Suu Kyi, er dømd fýra ára fongsulsrevsing, upplýsir ein talsmaður sambært Reuters.

Hon er dømd tvey ára fongsulsrevsing fyri at hava gjørt ímóti boðum frá hernaðarstýrinum og tvey ár fyri at hava brotið koronaraeglurnar.

Eisini frákoyrdi forsetin í landinum, Win Myint, er dømdur fýra ára fongsulsrevsing, upplýsir Reuters.

Noktar seg seka í øðrum ákærum

Hesir dómarnir eru bert byrjanin til dómarnar, sum 76 ára gamla Aung San Suu Kyi kann rokna við, tí hon er ákærd í tilsamans 11 málum. Hon sigur seg vera óseka í øllum ákærunum.

Herurin koyrdi stjórnina í Myanmar frá í februar. Tað varð gjørt, eftir at herurin skuldsetti Suu Kyi fyri valsvik eftir valið í november í fjør. Bæði altjóða eygleiðarar og valnevndin í Myanmar hava víst aftur, at svikað var.

Síðani hava hon og fleiri aðrir limir í stjórnini verið fongslað.