Avstralia: Skógareldur og vatnflóð í senn

Í Avstralia stríðast myndugleikarnir nú við tveimum náttúruvanlukkum í senn í hvør sínum enda av landinum. 

Har vesturi í Avstralia eru ógvisligirskógareldar,  og í eystara parti er glopraregn og vatnflóð.

Seinastu vikurnar er hitin komin upp í 40 stig, og ógvisligur turkur er fram við vesturstrondini.

Stór øki standa í ljósum loga, men fyribils er eingin fráboðan komin um fólkaskaða, ella at hús eru brunnin í grund.

Mesta avfallið í 122 ár

Í eystara parti av landinum hevur glopraregn verið í langa tíð, og tað hevur elvt til trupulleikar. 

Sambært veðurfrøðingum, hevur tað ongantíð regnað so nógv í 122 ár.

Nú er vatnflóð nógva staðni í New South Wales, og í økinum við Sydney vísa mátingar 21 sentimetrar avfall seinasta samdøgrið.

Veðurlagsbroytingarnar hava havt við sær, at veðrið er versnað í Avstralia.