- Tíðindi, mentan og ítróttur
Argja kirkja verður ikki flutt
![](https://kvf.fo/sites/default/files/styles/grein-ovasta-mynd/public/argja_kirkja_uttan.jpg?itok=E8P-n0cM)
Parkeringsplássini verða kanska flutt, og kirkjan verður møguliga flutt nakað niðan móti Støðlagøtu.
Men ætlanin er ikki at flyta staðsetingina úr Sandá til onkra aðrastaðni á Argjum.
Tað kom burturúr fundinum seinnapartin, sum var millum kirkjuráðið á Argjum, umboð fyri Tórshavnar kommunu og Brim Arkitektar, ið hava teknað vinnandi uppskotið.
2062 ynskja aðra staðseting
Fyrradagin fekk borgarstjórin í Havn 2062 undirskriftir handaðar frá fólki, ið ynskja eina aðra staðseting av Argja kirkju.
Tey vístu millum annað á, at økið við Sandá er eitt náttúruøkið, ið tey meta eigur at varðveitast.
Heðin Mortensen vísti tá á, at kirkjuráðið longu hevur arbeitt við ætlanini í nógv ár og hevur fingið endaligt byggiloyvi, og tí er ikki so lætt at broyta staðsetingina.
Borgarstjórini helt tó, at ein partur av misnøgdini hevði nakað við parkeringsplássini at gera.
Góður fundur
Forkvinnan í kirkjuráðnum, Sólrun Gleðisheygg, sigur, at tað var ein góður fundur í dag.
Nú fer Tórshavnar kommuna at kanna, um parkeringsplássini kunnu vera onkra aðrastaðni, og arkitektarnir fara eisini at tillaga uppskotið eitt sindur, um kirkjan verður flutt nakað niðan móti Støðlagøtu.