Løgtingsformaðurin: Løgtingsfundurin verður í dag

"Tingfundurin verður í dag."

So avgjørdur er Jógvan á Lakjuni, løgtingsformaður, tá Vágaportalurin spyr hann, um lagnuna hjá løgtingsfundinum, nú koronasmitta er staðfest í løgtingnum. 

Og løgtingsformaðurin, sum eisini er tingmaður fyri Fólkaflokkin, og ein av harðastu mótstøðufólkunum móti uppskotunum um sammøður, sigur eisini, at fundurin verður sum ætlað klokkan 13. 

Ivin um løgtingsfundin byrjaði um vikuskiftið, tá tað varð staðfest, at eitt starvsfólk í løgtinginum hevði fingið staðfest koronu. 

Jógvan á Lakjuni, løgtingsformaður, heitti á øll tingfólk um at lata seg kanna fyri koronu, áðrenn tey møttu í løgtinginum í dag, og tað hava tey so gjørt. 

Eitt tingfólk hevur eisini fingið staðfest koronu, og er tað ein av uppskotsstillarunum, Ingilín D. Strøm úr Javnaðarflokkinum. 

Kristianna Winther Poulsen loysir tískil Ingilín D. Strøm av, og sambært fráboðað frá Javnaðarflokkinum, so fer hon at atkvøða fyri uppskotunum um sammøður við 3. viðgerð í dag.