10. hvør føroyingur havt koronu

10. hvør føroyingur hevur nú havt koronu, síðani farsóttin fór at gera um seg í fjør vár.

Sambært korona.fo hava 5.261 fólk fingið staðfest smittuna í Føroyum. Hetta svarar til gott 10 prosent av fólkatalinum í Føroyum.

Knapt 4.800 eru vorðin frísk aftur, og í løtuni eru 469 fólk smittað, eitt lítið prosent av fólkatalinum í Føroyum.

Fleiri fáa sær triðja prikið

Talið av føroyingum, sum fáa triðja prikið, veksur spakuliga. 27,1 prosent av føroyingum, 12 ár og eldri, hava nú fingið triðja prikið.

Tað vísir nýggjasta uppgerðin á korona.fo í gjár.

90,4 prosent av teimum 12 ár og eldri hava fingið seinna prikið, meðan 92,5 prosent av teimum 12 ár og eldri hava fingið fyrra prikið.

Av samlaða fólkatalinum svarar tað til, at 77,2 prosent hava fingið fyrsta prik, 75,5 prosent seinna, og 22,6 prosent triðja.