Sálarfrøðingur knýttur at farsóttarnevndini

Ein sálarfrøðingur verður nú eisini knýttur at farsóttarnevndini.

Kaj Leo Holm Johannesen, landsstýrismaður, hevur gjørt av, at Annika Helgadóttir Davidsen, sálarfrøðingur, verður knýtt at nevndini sum serkøn í sálarfrøði.

Annika Helgadóttir Davidsen er sálarfrøðingur og Ph.d. Hon er knýtt at Deildini fyri Arbeiðs- og Almannaheilsu, sum er partur av sjúkrahúsverkinum.

Hon hevur drúgvar royndir sum sálarfrøðingur og granskari, og hevur millum annað granskað í, hvussu korona hevur ávirkað sálarheilsuna hjá arbeiðstakarum.

Átta limir í nevndini

Frammanundan eru átta limir í farsóttarnevndini.

Michael Boolsen, fúti, Lars Fodgaard Møller, landslækni, Birna Mørkøre, landsdjóralækni, Leif Abrahamsen, stjóri á Gjaldstovuni, og Bárður Enni, stjóri á Heilsufrøðiligu Starvsstovuni, eru fastir limir í nevndini.

Afturat teimum hevur landsstýrið valt Turid Arge, aðalstjóra í Heilsumálaráðnum, Tummas í Garði, læknafakligan varastjóra í sjúkrahúsverkinum, og Eyðun Mørkøre, stjóra í Taks.

Harumframt eru Bjarni á Steig, yvirlækni í sjúkrahúsverkinum, og Debes Christiansen, deildarleiðari á Heilsufrøðiligu Starvsstovuni, við sum ráðgevar á fundum í farsóttarnevndini.

Og nú verður sálarfrøðingur eisini knýttur at nevndini.

Farsóttin ávirkar eisini sálarliga

Landsstýrismaðurin í heilsumálum sigur, at koronufarsóttin ávirkar eisini fólk sálarliga, og tað hava vit skyldu til at taka í álvara.

- Tí haldi eg, at tað er rætt at knýta ein sálarfrøðing at farsóttarnevndini at ráðgeva í sálarfrøðiligum spurningum og meta um sálarligu árinini av ætlaðum átøkum, sigur Kaj Leo Holm Johannesen.

Annika Helgadóttir Davidsen

Annika Helgadótttir Davidsen, sálarfrøðingur, verður nú eisini knýtt at farsóttarevndini.