Suu Kyi dømd fýra ára fongsul

Fyrrverandi leiðarin í Myanmar og vinnarin av friðarheiðursløn Nobels, Aung San Suu Kyi, er dømd fýra ára fongsulsrevsing í einum rætti í Myanmar.

Tað skriva millum annað AFP og Reuters.

Sambært AFP, er Suu Kyi funnin sek í at hava havt ólóglig walkie talkie-tól, og so skal hon eisini hava brotið koronulógirnar í Myanmar.

Nógvur ófriður hevur verið í kjalarvørrinum av hernaðarkvettinum í Myanmar, og 1. februar er eitt ár liðið, síðani herurin koyrdi demokratiskt valdu stjórnina frá og tók valdið í landinum.

11.000 fólk handtikin

NTB skrivar, at fleiri enn 11.000 fólk eru handtikin, síðani herurin tók valdið, og fleiri enn 1300 fólk eru deyð undir ófriðinum.

Dómurin hjá Suu Kyi í dag er bert ein partur av einum størri rættarmáli móti henni, tí hon er ákærd í fleiri málum. Og verður hon verður funnin sek í øllum teirra, fær hon meira enn 100 fonguslrevsing.

Hon noktar seg seka í øllum ákærum, skrivar Reuters.

Lítið hevur verið at frætt um rættarmálið, og ongir óheftir eygleiðarar ella fjølmiðlar sluppu at fylgja við rættarmálinum. Hervaldið hevur eisini forðað sakføraranum hjá Suu Kyi í at úttala seg til fjølmiðlar, skrivar The Guardian.