Rudy Giuliani í rættin

6. januar-nevndin, sum kannar álopið á amerikonsku kongressina 6. januar í fjør, hevur stevnt fyrrverandi borgarstjóranum í New York og ráðgeva hjá Trump,  Rudy Giuliani.

Umframt Giuliani eru Jenna Ellis, Sidney Powell og Boris Epshteyn stevnd.

Øll fýra eru advokatar og vóru verjar hjá Trump, og settu fram falskar skuldsetingar um valsvik í sambandi við forsetavalið í 2020.

"Tey fýra, sum er stevnd, settu fram ógrundaðar teoriir um samansvørjing og valsvik, royndu at broyta valúrslitið, ella vóru í beinleiðis sambandi við fyrrverandi forsetan í eini roynd at steðga uppteljingini av valfólkum", stendur í fráboðan frá demokratiska kongressliminum, Bennie Thompson, sum er formaður í kanningarnevndini.

Nevndin vil hava skjøl og vitnisfrágreiðing frá Giuliani um hansara leiklut í at føra fram skuldsetingar hjá Trump um valsvik, og eisini kunning um royndirnar hjá Guiliani, har hann skal hava roynt at sannføra tænastufólk í umsitingini um at royna at broyta valúrlit.